இனி நான் காதலிக்கலாம்

இனி நான் காதலிக்கலாம்

யாரோ - அவள் வரும் பாதை பார்த்துக் காத்திருக்கலாம்

'அவள் வருவாளா ?' என்று பாடிக் கிடக்கலாம்

நெஞ்சம் படபடக்க பார்த்து ரசிக்கலாம்

பாவை பார்த்துச் சிரிக்க எங்கோ பறக்கலாம்

சம்மதித்தால் மடியில் தலை வைத்துத் தூங்கலாம்

அவள் தலை கோத குறும்பு செய்யலாம் 

பரிசு தந்து பரவசிக்கலாம்

முத்தம் தந்து முறைக்க வைக்கலாம்
கவிதை பல கிறுக்கலாம்

ஆம்,

நேற்றே என் (பழைய) காதலிக்கு 

இன்னொரு ஆணுடன் நிச்சயதார்த்தம் ஆகிவிட்டது;

விடுதலை ...விடுதலை ...விடுதலை ...

எதுவும் இன்னும் மறக்கவில்லை

மறக்காது இன்னும் ஞாபகமிருக்கு,
நெஞ்சை விட்டு நீங்காது நினைவிலிருக்கு;

உன் பார்வை, பரிதவிப்பு,

பேச்சு,பழக்க வழக்கங்கள்;
பள்ளியில் தள்ளி உட்கார்ந்திருந்தும்
கள்ளி நீ என்னோடு
கண்ணால் பேசியது,
மிதிவண்டியில் செல்கையில்
என் மீது மோதியது,
மன்னிக்கச் சொல்லி கை தொட்டுக்
கெஞ்சியது, பின்
கண்ணடித்துச் சிரித்தது ;எதுவும் இன்னும்
மறக்கவில்லை;

தீபாவளி தினத்தன்று
என்னோடு கோவில் வந்தது,
என் பெயர் சொல்லி
அர்ச்சனை செய்தது,
நீ கொஞ்சம் நான் கொஞ்சம் என்று
பிட்டு பிட்டு உண்டது,
என் உடை நனையாதிருக்க
தாவணியைக் குடையாய்ப் பிடித்தது,

எதுவும் இன்னும்
மறக்கவில்லை;

ஒன்றாய் சினிமா சென்றது,
நாயகி சிரிக்க சிரித்தது,
நாயகி அழ அழுதது,
முத்தமிடும் காட்சியில் மட்டும்
முடியாதென முரண்டு பிடித்தது,

எதுவும் இன்னும்
மறக்கவில்லை;

திருவிழாவில் நான் பெண் வேடமிட்டு
ஆடியதைக் கண்டு நீ நானியது,
வளையல் கடை ஆளிடம் சண்டையிட்டு
எனைக் கடை ஆளாய் மாற்றியது,
வளையல் மாட்டி விட்டதற்கு
குறைக்காது கூலி தந்தது,
குச்சி ஐஸ் தின்று
குரல் வராது திண்டாடியது,

எதுவும் இன்னும்
மறக்கவில்லை;

                                                   (மறக்காது இருந்தால் தொடரும்)